Foto e rrallë e agjencisë kineze të lajmeve HSINHUA. Më 30 shtator 1965 Kryetari i Këshillit të Shtetit të Kinës Çu En Lai (rreshti i parë në qendër) priti delegacionin e Ministrisë së Brendshme të Shqipërisë, të kryesuar nga Ministri Kadri Hazbiu (i treti majtas, 1922-1983). Në delegacion merrnin pjesë edhe Feçor Shehu (i pari majtas), Llambi Peçini etj. Këta të tre të likuiduar nga Enver Hoxha në vitet 1980 si armiq të popullit dhe partisë, si dhe për konspiracion me kinezët.

Detaj nga një foto e rrallë panoramike e agjencisë kineze të lajmeve HSINHUA. Në nëntor 1972 Kryetari i Këshillit të Shtetit të Kinës Çu En Lai (i treti majtas rreshti i parë) priti delegacionin ushtarak miqësor shqiptar, të kryesuar nga Ministri i Mbrojtjes Beqir Balluku (i dyti majtas rreshti i parë, 1917-1974). Mes të tjerash, Balluku u akuzua dhe u dënua me vdekje për konspiracion me Kinën për krijimin, fshehtas Enver Hoxhës, të boshtit ushtarak Tiranë-Beograd-Bukuresht-Pekin.

Më 11 nëntor 2004 nënkryetari i KQU këshilltar shteti dhe ministër i Mbrojtjes i Kinës Admiral Cao Gangchuan zhvilloi ceremoni zyrtare për nder të Ministrit të Mbrojtjes së Shqipërisë Pandeli Majko në Kinë. Si deputet i pozitës, ish-Kryeminstër dhe ish-Ministër Majko nuk merret me trafiqet e armëve kineze në dikasterin e Imamit, por me probleme gjuhësore, historike etj. Me këtë punë është vetë-ngarkuar deputeti Erion Braçe, që paditet nga Ministri aktual i Mbrojtjes, Arben Imami.

Më 11 qershor 2004 u zhvillua në Tiranë ceremonia e dorëzimit të ndihmave materiale nga qeveria kineze për qeverinë shqiptare Ambasadori kinez në Shqipëri Tian Changchun shkëmben listat e materialeve me kryetarin e bashkisë së Tiranës Edi Rama. Shefi i opozitës Rama bën diplomaci të lartë, pasi është banale të denoncosh thyerjen e embargos amerikane për armatimin kinez. Nuk ka ç’i bën nënkryetarit të grupit socialist në parlament, Erion Braçe, që paditet nga ministri Arben Imami. Kina e ka ndihmuar Ramën kur ishte kryetar bashkie, sikurse po ndihmon pasardhësin e tij të PD-së, Lulëzim Basha.

24 shtator 2012. Kryeministri Sali Berisha bisedon me zëvendëskomandantin e përgjithshëm të Policisë Ushtarake të Kinës, Gjeneral Dai Shujun. Përfaqësuesi i Pekinit: “Kjo vizitë do të vendosë piketat për një bashkëpunim më intensiv mes policive ushtarake të të dy vendeve, në aspekte të rëndësishme si lufta antiterror, asistimi dhe mbështetja e popullsisë civile në raste të emergjencave civile”

(Burimi: http://www.km.gov.al).