Basha: Njerëz të skeduar për vrasje nga Vlora dhe Fushë Kruja i kanë ofruar 200 mijë euro dëshmitarit x

Kryetari i Partisë Demokratike, Lulzim Basha, në një dalje për mediat mbrëmjen e sotme, denoncoi atë që e quajti thellimin e skenarit kriminal të Edi Ramës dhe Fatmir Xhafajt.

Basha tha se të dërguarit e Fatmir dhe Agron Xhafajt, njerëz të skeduar për vrasje nga zona e Vlorës dhe e Fushë Krujës i kanë ofruar një të afërmit të dëshmitarit x, Albert Veliu, 200 mijë euro që ai të përgënjeshtrojë deklarimet e bëra.

“Jam sonte në këtë orë të vonë të mbrëmjes para jush për të denoncuar thellimin e skandalit dhe skenarit kriminal të Edi Ramës dhe Fatmir Xhafajt të cilët po përdorin shtetin e kapur dhe kanë hedhur në veprim strukturat e krimit të organizuar nën urdhrat e tyre për të të kërcënuar dhe për ti bërë presion dëshmitarit x, shtetasit Albert Veliu dhe familjarëve të tij.
Sot të dërguarit e Fatmir dhe Agron Xhafajt, njerëz të skeduar për vrasje të tipit mafioz nga zona e Vlorës dhe e Fushë Krujës i kanë ofruar një të afërmi të dëshmitarit x, Albert Veliu 200 mijë euro nga paratë e pista që familja mafioze Xhafaj përfiton nga trafiku i drogës dhe veprimtari të tjera kriminale, që ai të përgënjeshtrojë deklarimet e bëra publike”, deklaroi Basha.

Kreu i PD-së paralajmëroi se “çdo përpjekje e Fatmir Xhafës dhe Edi Ramës për të kërcënuar, intimiduar apo për të blerë dëshmitarin x, thjesht i zhyt edhe më thellë Fatmir Xhafajn dhe Edi Ramën në skandalin ku janë përfshirë kokë e këmbë”.