Kreu i Myslimanëve: Fenë e zgjedhim ne, të qënit shqiptar e ka përcaktuar Zoti

Kreu i Komunitetit Mysliman të Shqipërisë, Skënder Bruçaj mendon se kombësia dhe feja nuk mund të krahason me njëra-tjetrën. I pyetur nga ‘Zëri i Amerikës’ për bashkëjetesën dhe harmoninë fetare në Shqipëri dhe për raportin e fesë me kombin, Bruçaj tha se kjo e fundit përcaktohet nga Zoti.

“Ne e zgjedhim vetë të jemi myslimanë, katolikë apo ortodoksë, ndërsa për të qenë shqiptarë është diçka që përcaktohet nga Zoti. Janë dy gjëra që nuk mund t’i krahasojmë”, u shpreh Bruçaj.

Sa i përket bashkimit të shqiptarëve në Ballkan, Bruçaj përdori të njëjtën gjuhë diplomatike si liderët politikë: “Bashkimi i shqiptarëve i përket të ardhmes, ndoshta kur të jemi pjesë e familjes evropiane.”