Mjerë Shqipëria.

Temperaturat e ftohta kanë mbrritur nëpër qafa malesh, në gryka dhe maja malesh. Po të ftohtit ka zbritur edhe më poshtë, fare poshtë e deri në Bulevardin politik tëTiranës.

Të ftohtët madje, gjarpëroi edhe në zyrat e kallkanosura të PS, ku edhe u vendos shkarkimi, izolimi, persekutimi politik i Kokëdhimës, e pra djallosja më e fundit e Ramë vetmitarit, të cilit, ja kanë të gjithë me hile dhe duan ta shfrytëzojnë e ta rrjepin.

Mirëpo Ramë vetmitari, si të gjithë despotët në dekadencë rakapjekthi, parapëlqejnë gjithmonë e më shumë të rrethohen nga mercenarët, se sa nga luftëtarët që përbashkohen rreth nje ideje. Sepse, sado utopike, e marrë apo e realizueshme qoftë kjo ide, përbashkimi rreth një ideje, rreth një projekti dhe rreth një sfide, dhe sado mëkate të bëhen në përpjekjen për realizim të asaj Ideje, njerëzit kanë gjithësesi mirëkuptim.

Dhe në këtë Mirëkuptim, të japin votë dhe pushtet, të japin shans pas shansi mundësi, madje edhe të falin në heshtje kur humbasin ca llokma financiare aty këtu.

Sepse mendojnë në mënyrën e tyre ata, që Ai ose Ata, po “luftojnë” për “Idenë e Madhe”, për një Shqipëri Ndryshe dhe sidoqoftë më të mirë se ajo e mëparshmja.

Dhe llokmat dhe mirëqënia e vjedhur, është pra, sipas gjykimit zemërgjerë kolektiv, një e “drejtë natyrale” e atyre që sakrifikojnë më shumë, rrezikojnë më shumë dhe shkurtojnë jetën e tyre në përplasjen e egër me realitetin që nuk ndryshohet lehtë.

Madje ka edhe nga ata ndjekës fanatikë, që lumturohen që “Barinjtë” e tyre qeverisës, të vishen e të ngjishen shtrenjtë, që ata dhe familjarët e tyre të jetojnë në mënyrë princërore, sepse, “Ai dhe Ata”, po bëjnë ca Punë të Mëdha, që kërkush tjetër nuk do të mundej ti bënte përveç tyre.

Goditja e Kokëdhimës, pak ditë pak rrëzimit spektakolar të Brisit ose Briseldës, rrëfen një çakërdisje autoritariste të liderit suprem, që po u afrohet gjithmonë e me shumë metodave koreano-veriore në punë të shtetit.

Sepse të godasësh në të njejtën mënyrë dhe stil, Kokëdhimën, një themelues të pushtetit tënd, të Ramës pra, po ashtu si ndodhi kokëkputja e Brisit të tatimeve, një kukull, ndër të shumtat kukulla të qeverisjes ramiste, do të thotë se Ramë vetmitari, është koreanizuar ditë pas dite.

E pra, Ramë vetmitar koeranoveriori, po qeveris e po kullandris pushtet, xhep e oborr të kukullave, dhe po rrethohet me specien e gjithëkohëshme të mercenarëve politikë, të blerë te “tregu MerrJep”, bosh nga idetë, por me nuhatje të mirë peshkaqeni, duke u kthyer shpinën e tij të gjatë, të gjithë atyre, që kanë përpos mishit dhe xhepit, edhe ca Ide e qëllime për një Shqipëri më të fisme.

Çfarë ka ndodhur?

Rama vetë, është mbrujtur, ndryshe nga çthonë kundërshtarët e tij politikë, prej genesh të fisme, të ardhura mirë, në magjen e trup dhe mendje formimit. Të gjithë ne që e kemi njohur nga afër, e kemi vlerësuar, këtë përkëdhelje dhe këtë bujari të natyrës tek personi i tij. Por të shbëhesh kaq shpejt nën trysninë e pushtetit të madh kryeministror, do të thotë të mos keshë pasur kockë të mirë. Përtej kockës poroze, Ay, kryeministri ynë, spaska më, as sy për të parë dhe as veshë për të dëgjuar dhe as laborator mendor për të analizuar, pasojat e mos-shikimit dhe të mos-dëgjimit!

Vetmia e tij, populluar nga peshkaqenë që sot shqyejnë prenë si “wardog”-ë për llogari të tij, por që shqyejnë çmbetet nga pasuria publike që të ushqejnë urinë e tyre patologjike për Para, po shndrrohet në një rrezik kombëtar, që sado krahë muskulozë politikë e pushtetmbajtës, të kenë Meta dhe Idrizi, rrokullisja nuk mund të ndalet.

Sepse Rama, ka hyrë në spiralen e pushtetit për Pushtet dhe po merr me shkelma idetë dhe ideatorët që e sollën atë në pushtet, njeri pas tjetrit dhe kjo lajmëron kohë të keqe për të gjithë, kur prisnim, që Ay, të ndreqte sidoqoftë disa gjëra të mbprapshta, trashëguar nga e kaluara.

Dhe mbi të gjitha e përpara të gjithave, të ndreqte Anti-meritokracinë dhe të pastronte shtetin nga turmat e teveqelëve dhe debilave me tesera partie ose jo, që po e fundosin krejt këtë anije të shpartalluar që quhet Shqipëri. Ta spastronte gjakatarët e lekut dhe hajdutët e kufomave! Të shporrte idiotët që thithin gishtat e këmbëve të shefave të tyre, në këmbim të bërxollës me patate, kukurecëve që rrjedhin lyrë dhe kostove marramendëse të grave të tyre, që lekët e spitaleve dhe shkollave të grabitura, i bëjnë proteza bythësh dhe gjoksesh.

Por Ramë vetmitari e premtimadhi, e shtoi këtë llum kombëtar hienash dhe brejtësish erëqelbur e punëshkatrrues dhe godet si koreano-verior Elitën e pakët që është formëzuar me kaq sakrifica! Dhe ky na qenkej vetëm fillimi…

Mjerë Shqipëria!