Është ky thelbi i ndryshimeve të fundit në Kodin e Procedurës Civile të ndërmarra me iniciativën e mazhorancës së majtë, që synon të favorizojë me ligj bankat.

Sipas ndryshimeve ligjore, bankat kanë të drejtë të shesin pronën e lënë si kolateral prej debitorëve deri në 30% të vlerës së përcaktuar nga vetë ekspertët e bankës.

Kjo do të ndodhë nëse prona nuk arrin të shitet në dy ankandet e parë.

Një masë e tillë duket diskriminuese ndaj debitorëve shqiptarë, ndërsa favorizon hapur bankat, pothuajse të gjitha të huaja.

Investitorët shpesh detyrohen të hyjnë në marrëdhënie kreditimi me bankat. Është një biznes në të cilin ata vendosin si kolateral pjesë të pasurisë, shpesh edhe bizneset e tyre, duke marrë nga bankat një borxh për të cilin paguajnë edhe interes.

Nuk e bëjnë për bamirësi, por për të fituar.

Por edhe bankat nuk i japin paratë ‘kuturu’. Ato vlerësojnë planin e biznesit, aftësinë shlyerse të kreditorit dhe pasurinë e lënë prej tij në kolateral.

Në këtë mënyrë, bankat kanë marrë rriskun e investimit. Për këtë rrisk ato kërkojnë edhe përqindjen e tyre të interesit.

Ndryshimet e fundit ligjore duket se favorizojnëpozitën e bankave në këtë marrëdhënie privatësh, duke i favorizuar për të marrë paratë e tyre, ndërsa dënojnë me falimentim shqiptarët që kanë hyrë në borxh ndaj bankave.

Edhe në ditët e veta më të këqija, bankat raportojnë qindra milionë euro fitime brenda një viti. Atëherë përse duhet t’u garantojmë një fitim edhe më të madh?

Një ndryshim i tillë në ligj duket si shmangie nga detyrimi i një qeverie që të mendojë së pari për qytetarët e vet dhe pastaj për bankat e huaja.