31/05/2016 16:52

Ka ca ditë që po e presim me minuta të na dalë një video edhe më e rëndë se ajo e Dibrës, kur kryetari i Bashkisë kërkonte seks në këmbim të një vendi pune. Pas saj nëpër media e rrjete sociale, po aq sa edhe në kafene, u diskutua përditë e më tepër për një video shumë më të rëndë seksi.

Po! Bëhet fjalë për një personalitet të lartë shtetëror (ministër?) i cili kryen marrëdhënie seksuale… me një transvesitit?

Të gjitha hamendjet dhe më tej fantazitë, janë të pranuara!

Opinioni ngjan me atë udhëtarin e shkretëtirës që sa më shumë ka etje aq më me vrap ndjek mirazhin. Kemi harruar urinë, kemi harruar padrejtësitë, kemi pranuar arbitraritetin, deformimin e demokracisë, rrënimin ekonomik dhe vrapojmë si të magjepsur pas telenovelave!

Po kujt i plasi se me kë dhe si shkon ky apo ai? Ministër a deputet, kryeministër a gjykatës, kur ne kemi jetët e shkatërruara prej keqqeverisjes dhe skandaleve të tyre me paratë tona e në kurrizin tonë. Teknologjia sot na jep mundësinë në kohë reale të ndjekim audiencën e atyre që botohen në portal. Qindra, mijëra lexime për shalët, cicat, buzët e bëra me operacion të personazheve butaforike të artit dhe ekranit shqiptar. Me gishtat e dorës numërohen leximet e lajmeve që kanë të bëjnë me ekonominë, jetën e përditshme, realpolitikën.

Jam i sigurtë që sa të hidhet ky koment në internet kurba e audiencës do të çajë majat. Jo se ka për ta lexuar njeri deri në fund. Këtë e kam të sigurtë si buka që ha. Tek rreshti i parë i paragrafit të katërt 80% e atyre që do hanë karremin e titullit do pështyjnë e do shajnë, të brengosur se nuk e ngopën babëzinë voyeuriste të atij që shkepi atë, se si ia bëri, sa herë, e të tjera intimitete për të cilat vdes audienca e vdekur e një elektorati po aq të vdekur, që stomakun bosh dhe ditët boshe mundohet me siklet të madh t’i mbushë me historira seksi të të tjerëve dhe sensacione nga bota boshe e artit dhe ekranit bosh shqiptar.