Meta-Lesi të “shqetësuar” për Berishën? Filloi si diversion ndaj PD-së, po përfundon si luftë Rama-Meta

Edi Rama ka urdhëruar nga Suedia përjashtimin e Sali Berishës për 10 ditë nga Kuvendi, me shpresën se Lulzim Basha do të ishtë në pozita të vështira me ish kryetarin e PD-së, për takimin e mundshëm me kryeministrin Rama. Ilir Meta i është bashkuar këtij skenari me shpresën se Basha nën hijen e Berishësë do të tërhiqej nga takimi.

Pasi mashtroi me disa media pranë tij se Lulzim Basha është tërhequr nga takimi me Ramën, prej përjashtimit që Meta dhe Rama i bën deputetit Berisha, kreu i LSI-së po tenton edhe me lajme të sponsorizuara (siç shihet nga foto) të pamundësojë takimin Basha-Rama.

Me shpresën e një përplasje Basha-Berisha, media afër qëndrimit politik të LSI-së po “shqetësohen” për një Pazar Rama-Basha në kurriz të Sali Berishës.

Pse ky shqetësim i Metës për Sali Berishën?

Në fakt shqetësimi ka të bëjë me vetë rolin e LSI-së në lojën e madhe politike. Një takim Rama-Basha për reformat e mëdha, është “de facto” zhbërje e rolit të LSI-së në politikën aktuale. Një marrëveshje ndërmjet dy të parave e bën të parendësishme të treten.

Ky është shqetësimi real. Ditën që Ilir Meta bindet se Edi Rama nuk bën llogaritë politike me LSI-në por me opozitën, tentative për diversion me PD-në kthehet në përplasje Rama-Meta.

Gjatë muajve Qershor-Shtator 2013 Ilir Meta e justifikonte refuzimin e telefonatave të tij në drejtim të Bashës, me argumentin se Luli ka frikë se Berisha i përgjonte telefonin. Më pas nëpërmjet gazetarve dhe biznesmenëve të njohur, Ilir Meta dështoi të organizonte një drekë më shefin e ri të opozitës, drekë që kishte për qëllim shantazhin ndaj Edi Ramës.

Duket qartë se atë që nuk realizoi dot Meta po tenton ta bëjë sot Edi Rama. Të shantazhojnë njeri-tjetrin nëpërmjet takimeve me kryetarin e opozitës.

A do të flasë sërish Ilir Meta për marrëveshje kënetash? A do ti kujtojë sërish doktorit se PO-ja e tij është PO dhe JO-ja JO? Dhe si përfundim, si mund të jetë Ilir Meta tashmë një politikan i besueshëm, kur Edi Rama i ka veshur kostumin e Taulant Ballës në drejtimin e Kuvendit?

Më shumë e ka zhburrëruar Rama Metën duke i veshur kostumin e Taulantit, se sa Meta Ramën duke i veshur breket e grisura të Shukriut…