Kryetarët e 35 degëve të Partisë Demokratike dhe strukturave drejtuese të tyre do të përfshihen në procesin e rizgjedhjes së tyre. Vendimi që doli nga mbledhja e Kryesisë së PDsë,  ditë më parë u dha nga kryetari i PD-së Lulzim Basha, i cili tha se do të shtohen edhe 14 degë të reja, duke çuar kështu numrin e degëve të PDsë në 67, ka irrituar disa nga krerët e degëve, të cilët do të detyrohen të rikandidojnë dhe pse nuk u ka mbaruar mandati. Projekti i propozuar nga Grupi i Punës, muaj më parë pas analizës së zgjedhjeve në Partinë Demokratike, ku kërkohet krijimi i degëve të reja, si dhe ndryshimet në strukturat drejtuese në gjysmën e degëve, ka triumfuar pavarësisht kundërshtimeve që i kanë bërë disa nga krerët e disa prej degëve të mëdha. Kryetarët e degëve janë shprehur se organizimi sërish i zgjedhjeve dhe shtimi i degëve në disa qarqe do të fusë në amulli PD-në. Drejtuesit e degëve që kundërshtojnë projektin e ri të Bashës, e kanë quajtur këtë propozim si të gabuar pasi sipas tyre copëton degët e bashkive në qendër qarqesh, si dhe pren kokat e disa krerëve me ndikim.

Kryetari i degës së PD-së në Pogradecit, Renato Peza, është shprehur se është i paqartë për vendimin që ka marrë kryesia e PD-së, pasi, sipas tij, dega që ai drejton ka dalë fituese në zgjedhje duke fituar edhe bashkinë e Pogradecit. “Ne si degë jemi të befasuar nga vendimi i kryesisë. Nuk e kemi pritur mirë, pasi në udhëzimin që kemi marrë nuk thuhet se do të ketë zgjedhje në degën e Pogradecit, ndërkohë në listën që është publikuar në media ka dalë se do të ketë zgjedhje. Dega e Pogradecit është fituese në zgjedhjet lokale. Do të kërkojmë që të sqarohet nga grupi i punës që ka ardhur në këtë përfundim”, është shprehur Preza