Ai është vetëm një prej qindra emigrantëve shqiptarë që ka ngjitur shkallët e Gjykatës së Tiranës, fillimisht për të regjistruar të bijën si greke, e më pas për të greqizuar emrat “e papërshtatshëm” të prindërve. Duke shfrytëzuar origjinën e bashkëshortes, H. P. ka ndryshuar në gjykatë kombësinë e vajzës së tij. Por jo vetëm kaq. Është rikthyer një muaj më pas, me pretendimin se në dokumentet greke, emrat e prindërve i kishte Andrea e Anthulla. I kërkonte Gjykatës së Tiranës që ata të rezultonin të tillë edhe në regjistrin shqiptar, e jo më Muharrem e Xhikme, siç quheshin në të vërtetë.

Gjykata e Tiranës s’i ka bërë dysh kërkesat e këtij emigranti, duke shtuar një greke në regjistër e dy gjyshër, tanimë “të denjë” për të. Histori të tilla, në dosjen e shqiptarëve të greqizuar të Gjykatës së Tiranës gjen me qindra. Një ndër konvertimet më të fundit në kohë është ajo e një familjeje çame, që më 24 maj 2010 fitoi në të njëjtën gjykatë kombësinë greke. Në këtë vendim thuhet se paditësit pretenduan se janë me origjine çame nga Greqia dhe se të dy prindërit, Alije Rakipi dhe Halil Rakipi ishin lindur në Greqi, fakt ky që provohet nga certifikatat familjare. Kjo familje kishte përfituar shtetësi shqiptare, me dekretin e vitit 1953 për popullsinë çame, por vite më vonë trashëgimtarët preferuan që në kolonën e kombësisë të rezultonin grekë.

Dosja “greke” në Tiranë

Historitë e mësipërme, të zbuluara përmes dosjes së konvertimeve etnike në Gjykatën e Tiranës, tregojnë se kombësia shqiptare është një mall që shitet lehtë, në dyert e drejtësisë. Mjafton një padi dhe një certifikatë e paraardhësve, e cila në shumë raste mund të jetë e falsifikuar, për t’u kthyer në grek, janë vendimet e Gjykatës së Tiranës për shtetasit që i janë drejtuar kësaj të fundit për ndryshimin e kombësisë, nga shqiptare në greke. Në bazë të këtyre vendimeve, rezulton se nga viti 2004-2010 janë 207 qytetarë shqiptarë që kanë kërkuar ndryshimin e kombësisë në Tiranë. Ky numër bëhet disa herë më i madh, po të llogarisësh dhe kërkesat të cilat janë refuzuar apo rrëzuar nga gjykata. Mes morisë së vendimeve të dhëna gjatë 7 viteve të fundit, përballesh me një sërë pretendimesh të ngritura për ndryshimin e kombësisë, por përqindjen më të madhe e zënë rastet kur paditësit paraqesin certifikata të njërit prej prindërve, të cilat figurojnë me kombësi greke. Duke shfrytëzuar ligjin “Për Gjendjen Civile”, paditësit zgjedhin pa hezitim prindin me kombësi greke, si origjinë për t’u trashëguar.

Harta e konvertimeve

Sipas inspektimeve të fundit të KLD-së, Gjykata e Tiranës rezulton më pak e prekura nga fluksi i qytetarëve shqiptarë që duan të ndërrojnë kombësinë. Kambana e alarmit, e cila është dëgjuar tashmë falë shqetësimit të ngritur nga nënkryetari i KLD-së, Kreshnik Spahiu, tregon se Gjirokastra është qarku më problematik, me 1600 raste. Një tjetër evidencë na vjen nga Përmeti, ku gjatë kësaj periudhe kohore ka pasur mbi 600 raste të lënies së kombësisë shqiptare për atë greke, ndërsa problematike rezultojnë rrethe të tjera si Saranda, Korça apo Vlora ( ku përfshihet Himara), qytete këto të njohura për pretendimet e kahershme të qarqeve të caktuara greke. Por ç’i shtyn shqiptarët të heqin dorë në masë nga kombësia e të parëve? Skedari i Gjykatës së Tiranës, por edhe i dy gjykatave të tjera ku janë kryer inspektime, tregon se flukset e kërkesave përkojnë me dy ngjarje në periudha të ndryshme kohore. “Sezoni” i parë është shënuar në vitet 2004-2005, kohë që përkon me premtimin e kryeministrit grek Karamanlis për t’u dhënë shtetësi greke të gjithë atyre që kishin kombësi greke. Muajt e fundit shënojnë dyndjen e dytë të qytetarëve shqiptarë në gjykatë, çka përkon me procesin e shumëdebatuar të regjistrimit të popullsisë, që pritet të fillojë pas 2 muajsh.

Xhuvani, padi për kombësinë greke

Mes morisë së qytetarëve që kanë ndryshuar ose korrigjuar kombësinë, është dhe aktorja e mirënjohur dhe deputetja e Parlamentit të Shqipërisë, Luiza Xhuvani. Ajo ka kërkuar në Gjykatën e Tiranës që t’i korrigjohet gabimi i kryer gjatë transferimit të dokumentacionit nga Saranda në Tiranë, ku, sipas pretendimit, kombësia e saj ishte shënuar gabimisht si shqiptare nga Zyra e Gjendjes Civile pranë Njësia Bashkiake Nr. 2 në Tiranë. Xhuvani i është drejtuar Gjykatës së Tiranës në vitin 2008, duke kërkuar që në regjistër t’i shënohej kombësia greke, duke qenë se babai i saj është grek dhe e kishte fituar këtë të drejtë. Në vendimin e Gjykatës, Luiza Xhuvani paraqet argumentin se me transferimin e dokumentacionit nga qyteti i Sarandës në qytetin e Tiranës është bërë edhe gabimi në rubrikën kombësia, prandaj ajo i është drejtuar Gjykatës për korrigjimin e gabimit në aktet e Gjendjes Civile, përsa i përket rubrikës “kombësia”. “Gjykata çmon se Kombësia e foshnjes në regjistrin themeltar shënohet në bazë të vullnetit të të dy prindërve ose kombësinë e njërit prej tyre dhe sipas vullnetit të fëmijës kur ky bëhet madhor.” Paditësja, sipas vullnetit të prindërve, ka marrë kombësi greke, prandaj dhe kërkon që të figurojë me këtë kombësi. Në këto rrethana, Gjykata çmon se kërkesë-padia është e drejtë dhe e bazuar në ligj dhe si e tillë duhet pranuar” – thuhet në vendimin numër 10105 të datës 21.11.2008 të Gjykatës së Tiranës.